Республика күні – елдік пен бірліктің мерекесі
25 қазан – Қазақстан Республикасының тарихындағы айрықша маңызға ие күн. Бұл күні еліміздің мемлекеттік мерекелерінің бірі – Республика күні аталып өтеді.
Аталған мереке – егемендік пен тәуелсіздікке бастау болған тарихи күн. 1990 жылы дәл осы күні Қазақ КСР Жоғарғы Кеңесі «Мемлекеттік егемендік туралы Декларацияны» қабылдады. Бұл құжат Қазақстанның өз тағдырын өзі шешетін дербес мемлекет болуына құқықтық және саяси негіз қалады. Республика күні – елдің тәуелсіз дамуының, бірлігі мен тұтастығының символына айналды.
Осыған орай біздің колледжде де кең көлемде мерекелік іс-шаралар апталығы ұйымдастырылды.
Эссе байқауы – елге деген сүйіспеншіліктің көрінісі
Апталық аясында студенттер арасында «Менің Отаным — Тәуелсіз Қазақстан!» атты эссе жазу байқауы өтті. Бұл байқаудың мақсаты – жастардың бойында елжандылық сезімді қалыптастыру, туған жерге, мемлекетке деген құрметті арттыру.
Қатысушылар өз шығармаларында тәуелсіздіктің мәнін, ел дамуының жетістіктерін, бейбітшілік пен тұрақтылықтың қадірін сезіндіре білді. Көптеген жұмыстарда ел болашағына деген сенім, ұлттың бірлігі мен жаңару идеялары көрініс тапты. Жеңімпаздар арнайы алғыс хаттармен және естелік сыйлықтармен марапатталды.
Концерттік бағдарлама – патриоттық рухтың көрінісі
Мереке қарсаңында колледждің акт залында мерекелік концерттік бағдарлама өтті. Концертке колледждің дарынды студенттері мен шығармашылық ұжымдары қатысып, тамаша өнер көрсетті.
Шара барысында патриоттық әндер шырқалып, күй мен би орындалды. «Атамекен», «Туған жер», «Менің Қазақстаным» сияқты әндер көрермендердің ыстық ықыласына бөленді.
Сахнада студенттер ел тарихына арналған көріністер қойып, Тәуелсіз Қазақстанның қалыптасу кезеңдерін бейнеледі.
Мерекелік шараға колледж әкімшілігі, ұстаздар, студенттер мен қонақтар қатысты. Іс-шара барысында колледж директоры барша қатысушыларды Республика күнімен құттықтап, тәуелсіздік – ұлттың ең қастерлі құндылығы екенін атап өтті.
Патриоттық тәрбие – басты мақсат
Республика күніне арналған осындай іс-шаралар студенттердің азаматтық ұстанымын нығайтып, елжандылық рухын арттырады. Жастардың бойында мемлекетке деген сүйіспеншілік пен жауапкершілікті қалыптастыру – колледждің басты тәрбиелік бағытының бірі.
Бүгінгі Қазақстан – бейбітшілікті ту еткен, дамудың даңғыл жолына түскен мемлекет. Еліміздің болашағы – білімді, саналы, патриот жастардың қолында!
Баршаңызды Республика күнімен шын жүректен құттықтаймыз!
Посмотреть эту публикацию в Instagram
Посмотреть эту публикацию в Instagram